General Motors gaan in ’n bankrotskap-verhoor toestemming vra om meeste van sy bates aan ’n nuwe maatskappy te verkoop – een wat nie deur ou skuld belas word nie.
GM beweer die skep van die “Nuwe GM” is die enigste manier om die maatskappy van likwidering te red en het onderneem om sterker en meer gefokus daaruit te kom.
Regter Robert Gerber het tot dusver in GM se guns beslis in elke mosie wat voor die hof gelê is sedert die motorvervaardiger beskerming teen bankrotskap begin soek het.
Unisa se finansiële posisie lyk beduidend beter, aldus raadsvoorsitter Mathews Phosa.
Dit ten spyte van die “struikelblokke as gevolg van die samesmelting van die voormalige Unisa, Technikon SA en Vista Universiteit se afstandsonderrig-komponent”, sowel as die “volgehoue moeilike finansiële klimaat waarbinne SA universiteite hulself bevind het.
Unisa se finansiële verslag word nou aan die departement van onderwys oorhandig.
Die Nasionale Unie van Mynwerkers (NUM) sê hy sal sy eis van 15% loonverhoging vir sy lede by Anglo Platinum verlaag omdat die maatskappy byna voldoen aan sy ander eise.
NUM se Lasiba Seshoka sê Angloplat het ingestem om die maandelikse minimum loon van oppervlaktewerkers te verhoog tot R4 000 en dié van ondergrondse werkers tot R4 400. Die unie het R4 200 en R4 500 onderskeidelik geëis.
Die MTN-groep se goeie vordering in Iran kan potensiaal probleme vir VS banke beteken, wat hul oog het op ’n rol in die maatskappy se beplande sameselting van meer as $20 miljard met Indië se Bharti Airtel.
MTN het ’n jaar gelede, toe die partye oor samesmelting gesels het, sowat 6 miljoen gebruikers in Iran gehad, maar sy besigheid daar, in die Soedan en Sirië, het sedertdien gegroei tot 18.2 miljoen in die laaste kwartaal.
MTN se jaarlikse verslag sê 13% van sy 2008-inkomste het uit dié drie lande gekom – drie state waar die VS Tesourie se se Buitelandse Batebeheer streng beperkings op VS-maatskappye plaas en hulle effektief verhoed om direk en indirek betrokke te wees weens sanksies.
Die bieproses vir Pamodzi Gold se Orkney-myn sal heropen word, aldus die gesamentlike voorlopige likwidateurs van dié myn.
Volgens ’n verklaring kan belangstellende partye hulle aanod binne drie weke van die amptelike kennisgewing indien, waarna dit oorweeg sal word in samewerking met die hoofkrediteur, vakbonde en die Bedryfsontwikkelingskorporasie.
Simmer & Jack het onlangs aansoek gedoen om die myn moontlik oor te neem.
MTN het ontken dat sy Iran-netwerk, Irancell, nie werk nie en dat hy ’n maand se inkomste uit dié land kwyt is weens geblokkeerde selfoonseine.
“Daar is niks fout nie,” sê woordvoerder Nozipho Januray-Bardill. Dit volg na koerantberigte dat Iran seine van selfoonnetwerke geblokkeer het ná geskille oor die verkiesing van vroeër vandeesmaand.
’n Staking deur papierwerkers dreig by Mondi en Sappi.
Die unie, Ceppwawu, sê hy het ’n geskil verklaar met dié twee maatskappye ná loononderhandelings oor die afgelope twee maande misluk het. Die unie eis ’n 17% loonverhoging en die onmiddelikke afskaffing van arbeidmakelaars. Die maatskappye het 4.5% aangebied.
Ceppwawu het ’n sertifikaat van die Kommissie vir Konsiliasie, Mediasie en Arbitrasie verkry, wat werkers toelaat om hul toerusting binne die volgende 48 uur neer te lê.
Transnet sê sy plan om die spoorafdeling se steenkoollyn op te gradeer, is 12 maande agter skedule weens die laat aflewering van nuwe lokomotiewe. Transnet-hoof Chris Wells sê die vertraging sal minimale impak hê op die vervoer van uitvoer-steenkool na die hawe, aangesien produsente kleiner volumes vervoer weens die ekonomiese afswaai.
“Ons het die kapasiteit om sowat 70 miljoen ton af te lewer.”
Hy sê Transnet beplan steeds om 80.5 miljard te spandeer aan die opgradeer van sy infrastruktuur, maar dat sommige kleiner projekte uitfaseer mag word.
Die Verbruikersprysindeks (VPI) het in Mei met 8% jaar-op-jaar gestyg, aldus Statistiek SA.
Die VPI het maand-op-maand met 0.4% gestyg sedert April en daar is verwag dat verbruikersinflasie ’n toename van 7.9% sou toon, aldus ’n meningsopname van ekonome by I-Net Bridge. Die voorspelling het gestrek van 7.6% tot 8.0%.
Vrae word gevra oor ’n MTN sms-kompetisie waarin gebruikers gevra is om in te skryf teen R7.50 per sms. Die persoon met die meeste korrekte sms’se kon skootrekenaars, ’n motor en ’n R1 miljoen huisverband wen.
Maar volgens ’n ongeïdentifiseerde bron het die wenners wat met die Toyota Fortuner weggestap het, glo presies geweet hoeveel smsse om te stuur om te wen. Die bron het glo gehoor hoe iemand in ’n openbare plek vertel dat iemand hom die bronkode gegee het en dat hy mense se antwoorde op ’n URL kon tel.
MTN SA algemene bestuurder Donovan Smith sê hulle het ’n forensiese ondersoek na die saak geloods, maar dat die oudit gewys het alles is korrek.
FirstRand het gewaarsku dat die verwagte afname in die makro-omgewing, binnelands en globaal, selfs meer negatief kan uitspeel as wat die groep verwag het.
Die groep verwag dat sy wesensverdienste vir die jaar tot einde Junie met tussen 28% en 33% kan daal. Verdienste per aandeel is verwag om te val met tussen 39% en 44% van 2008 se 218.2 sent.
Telkom sê sy nommer 1 prioriteit is om sy Nigeriese besigheid om te keer, wat ’n verlies van R1.76 miljard gemaak het.
Die groep se 2009 finansiële resultate het ’n 45.9% daling in wesensverdienste per aandeel getoon. Wins het met 47.7% gedaal tot R4.170 miljoen.
“Ons beskou die situasie by Multi-Links in Nigerië in ’n ernstige lig,” meen Telkom-hoof Reuben September. Hy sê Nigerië is nie immuun teen die wêreldwye krisis nie, aangesien dit ’n olie-gebaseerde ekonomie is.
Die minibustaxi-bedryf eis volle eienaarskap van die Snelbusdiens, oftewel BRT. Die Nasionale Taxi-Alliansie se sekretaris-generaal Alpheus Mlalazi sê sy bedryf het die roetes ontwikkel wat die BRT-stelsel nou teiken en sê dis regverdigbaar dat die taxibedryf intellektuele eiendom kan eis.
Hy sê as die regering nie wil begin onderhandel nie, daar protesaksie sal volg.
Die Mededingingstribunaal het aangehoor dat Andries Goosen, bestuurder van Sasko se bakafdeling, nie geweet het daar word telefonies met konkurrente gesels nie.
Pioneer Foods, aan wie Sasko behoort, word beskuldig daarvan dat hy met ander broodvervaardigers gekonkel het. David Unterhalter, regsverteenwoordiger vir die Mededingendheidskommissie, sê geen stappe is geneem om oortreders by Sasko te straf nie.
Pioneer ontken alle betrokkenheid by vergaderings om prysvasstelling op brood te bepaal, maar Premier Foods, Foodcorp en Tiger Brands het met die kommissie geskik en boetes betaal.
Beleggingsgroep Remgro het ’n 21.7% verlies in wesensverdienste per aandeel vir die 12 maande wat in Maart geïndig het, aangekondig, van 1 692.8 sent na 987.7 sent.
Wesensverdienste peraandeel van voortgesette operasies het afgeneem met 30.3%, van 964.1 sent tot 671.5 sent. Die groep het ’n finale dividend van 110 sent per aandeel verklaar, in vergelyking met die 330 sent per aandeel vir verlede jaar.
Remgro-hoof Thys Visser het die resultate grootliks toegeskryf aan die ontbondeling van BAT en die ekonomiese toestand.
Spandering in huishoudings is deur die ekonomiese afswaai getref, meen die Reserwebank in sy kwartaallikse bulletin.
Spandering het met 4.9% in die eerste kwartaal vanjaar gedaal, wat volg op ’n 2.7% afname in die laaste kwartaal van 2008. Huishoudings se spandering op duursame goedere hou aan daal, wat, so sê die Reserwebank, die “finansiële stres” in dié sektor en lae verbruikersvertroue weerspieël.
Meer welgestelde elektrisiteitsverbruikers kan gevra word om die armer gebruikers te help dra aan die 34% Eskom-tariefverhoging, maar die goeie nuus is dat daar geen kragonderbrekings sal wees dié winter nie.
Eskom-woordvoerder Fanie Zulu kon nie die versekering gee dat niemand meer as die voorgestelde 34% sal betaal nie. “As Nersa sê ons moet die armes beskerm en fooie teen hierdie koers hou… dan moet ons sien hoe die armes ’n kleiner rol kan speel.”
Pryse in Zimbabwe hou aan daal ná ’n dekade van hiperinflasie wat die ekonomie vernietig het.
Die regering se sentrale statistiek-kantoor sê die maand-tot-maand inflasiekoers in Mei was -1.0%, in vergelyking met -1.1% in April.
Hulle skryf dit toe aan die afskaffing van die plaaslike geldeenheid, die Zim dollar, en bereken nou inflasie gebaseer op VS dollar-pryse.
Die eiendomsmaatskappy Barwa, wat in Qatar gebaseer is, eis terugbetalings van Barry Tannenbaum se Frankel-maatskappy.
Tannenbaum, beweerde meesterbrein van ’n Ponzi-skema, het volgens berigte glo vervalste bestellings van groot farmaseutiese maatskappye aan voornemende beleggers gewys.
Barwa het in ’n verklaring gesê hy het sy wentelkrediet-fasiliteit onmiddellik gestaak toe die nuus van die vermeende bedrogspul breek en só ’n beduidende bedrag krediet gespaar, maar dat die res van die geld ook terugbetaal moet word.
Die tekort op Suid-Afrika se lopende rekening is groter as verwag in die eerste kwartaal van 2009, soos uitvoere tuimel in die wêreldwye resessie, aldus die sentrale bank.
Die gaping het van 5.8% in dieselfde tyd verlede jaar vergroot tot 7% van die BBP vanjaar, oftewel R163.7 miljard.
Die bank sê ook ’n verlangsaming in SA se grootste handelsvennote het uitvoere geraak, wat met 21% gedaal het, of 19.4% in waardeterme.
Die unies van SA mynwerkers en goudprodusente het met ’n bemiddelingsliggaam ontmoet om ’n staking oor loonverhogings te vermy, iets wat die goudmaatskappye sê hulle nie kan bekostig nie.
Die unies het gesê hulle het dooiepunt bereik in onderhandelings en dat ’n staking onvermydelik is, sou die bemiddelingspoging faal.
Die Nasionale Unie van Mynwerkers en Solidariteit het ’n verbeterde aanbod van 7% geweier en ’n bemiddelaar ingeroep. Die mynwerkers eis 15%.
Die boubedryf staar moeilike omstandighede in die gesig, meen hoofekonoom van FNB, Cees Bruggemans ná die vrystelling van die FNB Bouvertroue-Indeks.
Hy sê dat hoewel daar ’n 450 basispunt-afname in rentekoerse was, ’n groot deel van dié voordeel egter geneutraliseer is deur die strenger kriteria van finansiële instellings.
“Die algehele vraag vir bouwerk bly dus ernstig ingeperk,” meen Bruggemans.
Straathandelaars het kratte verrotte vrugte en groente van die Warwick Junction vroegoggendmark verwyder onder die wakende oog van die metropolisie.
Die stad se plan om ’n inkopiesentrum op dié plek te bou het talle handelaars ontstoke. Hulle het dié week ’n derde Hoërhofbevel gekry wat die munisipaliteit beveel om hulle toe te laat om aan te hou handel dryf.
Die IFP het die stad se behandeling van die handelaars beskryf as “taktiek in die apartheid-styl” ná berigte dat die metropolisie rubberkoeëls gebruik het.
Die algehele omgewing vir werk in SA is veel meer negatief en sal so bly tot 2010, aldus menslike kapitaalbestuurfirma Adcorp.
Dit is bevestig deur ’n kwartaal-op-kwartaal afname van 12.9% in Adcorp se Indiensnemingsindeks. Adcorp meen in ’n verklaring die omgewing is “beïnvloed deur die beduidende afname in makro-ekonomiese aktiwiteit (17.1%) en die vraag na arbeid wat met 5.7% gedaal het”.
Adcorp Holdings-hoof Richard Pike sê egter sekere vaardighede bly in aanvraag, veral dié in die finansiële dienste, ingenieurswese, natuur- en fisieke wetenskappe, medies en gesondheid, onderwys en informasie- en kommunikasietegnologie.
Die Ekonomiese Vennootskapsooreenkoms (EPA) met die EU moenie die SA Doane-unie (Sacu) ondermyn nie, sê minister van handel en nywerheid Rob Davies.
Dit volg na Botswana, Lesotho en Swaziland die EPA onderteken het, met Mosambiek wat lyk of hy wil teken. Suid-Afrika, Namibië en Angola glo egter fundamentele kwessies moet uitgesorteer word voor die ooreenkoms onderteken word, aldus Davies.
Die versnelling van breëbandvoorsiening is die sleutel tot ekonomiese groei in Suid-Afrika en die kontinent, aldus Intel se John Davies. Hy sê owerhede moet ’n rol speel om die regulerende omgewing reg te kry en vinniger belastingverdiskontering van kapitaaltoerusting toelaat.
Volgens Davies is die VSA en Turkye goeie voorbeelde van hoe telekommunikasie groei aangespoor het. Indië, weer, bied internet-toegang teen gesubsidieërde koerse. Daar, nes in SA, is ’n lae basis van breëbandgebruikers.
Zimbabwe se supermarkte is weer vol ná die land die wêreldrekord-hiperinflasie ingeperk het. Die meeste mense kan egter nie bekostig om enigiets te koop nie. “Dis ’n luukse vir die wat geld het om te koop,” sê die 36-jarige Marian Chituku.
In Harare se ryker buurte kan ryker inwoners egter kies en keur. “Jy kan alles kry wat jy wil, solank jy geld het,” meen Josephine Marucchi, ’n huisvrou van die welgestelde buurt Mount Pleasant. Die leë winkelrakke is nou vol danksy die rekering wat besighede gedwing het om pryse te sny en die afskaffing van die Zim dollar.
Die Chinese regering het sowat 10 miljoen yuan (R1.5 miljoen) belê in Shanghai om dit die ‘Broadway van die Ooste’ te maak.
Owerhede hoop ’n teater-streek sal geld na die omringende besighede bring. Die fondse sal gebruik word om teaters op te knap, oorspronklike toneelstukke te ontwikkel en jong kunstenaars te slyp. Die Majestic-teater staan in die middel van die distrik, wat die “Dramavallei” genoem word.
“Ons plan is om ’n moderne dramavalley te bou wat binne ’n dekade kan kompeteer met Amerika se Broadway en Londen se Weseinde,” aldus die regering se Zhang Rengliang.
Die regering het vir homself ’n spertyd van ses maande gestel om ’n multi-miljard rand plan te implementeer om 500 000 werksgeleenthede te skep.
Adjunk-president Kgalema Motlanthe is vasberade dat dié poging om die impak van die ekonomiese krisis nie buite bereik is nie.
Hy het aan die Internasionale ArbeidsKonferensie in Genéve gesê dat die nuwe werksgeleenthede ook “groen werk” sal insluit, en dat die ekonomiese krisis “gebruik kan word om ons weg te stuur van gevestigde sakepraktyke wat skadelik is”. Hy sê die groen ekonomie in Suid-Afrika moet groei.
Van Suid-Afrika se rykstes en ’n aantal internasionale beleggers is vasgevang in die ponzi-skema wat na bewering deur Barry Tannenbaum georkestreer is, ná beloftes van tot 80% opbrengs op hul beleggings binne ’n jaar.
Dit het aan die lig gekom dat voormalige JSE-voorsitter Norman Lowenthal, voormalige Bond Exchange HUB Tom Lawless en die prokureur Warren Drue onder dié is wat ingeloop is.
Die Londen-gebaseerde SABMiller verwag dat vier beplande aanlegte in Afrika meer wins sal inbring as sy tien ander regoor die wêreld, aangesien dié kontinent die minste deur die finansiële krisis geraak word, aldus hoof uitvoerende beampte Graham McKay.
Die brouer het 55 000 plaaslike boere gekry om graan teen 2012 te produseer. SABMiller maak buiten Suid-Afrika tans bier in 15 Sub-Sahara lande.
BP SA het ’n multimiljoen rand brandstofborgskap aangekondig om kragopwekkers by stadions tydens die Wêreldbeker te laat loop en so die risiko van kragonderbrekings te verminder.
Dit is die grootste borgskap wat BP in sy 100-jaar geskiedenis onderneem, sê hoof van BP Afrika, Sipho Maseko.
Fifa het intussen aangekondig Metrorail se moedermaatskappy, Prasa (Passenger Rail Agency of SA) en Neo Africa is amptelike Wêreldbeker-ondersteuners.
Omset by Labat Africa het sedert Februarie verlede jaar van R154 miljoen gedaal tot R42 miljoen vanjaar.
Dit beteken ’n basiese verdienste van 29.2 sent per aandeel, in vergelyking met ’n verlies van 0.4 sent verlede jaar. Die styging in verdienste per aandeel is toegeskryf aan waarde-aanpassings op eiendomme van R17.3 miljoen en ’n rekeningkundige wins van R48.8 miljoen deur die ontbondeling van Total Client Services.
Wesensverdienste per aandeel het gestyg van 0.5 sent tot 5.1 sent, terwyl netto batewaarde per aandeel gestyg het van 11.5 sent tot 11.6 sent.
De Beers se samewerkingsooreenkoms met die Botswana-regering, Debswana, mag vanjaar dalk minder as die helfte van sy normale uitsette lewer ná hy bedrywighede in Februarie weens die ekonomiese afswaai gestaak het, aldus woordvoerder Esther Kanaimba.
De Beers verkoop sowat 60% van die wêreld se ongeslypte edelstene en Kanaimba sê vanjaar se uitset kan sowat 13-15 miljoen karaat wees.
Hoof uitvoerende beampte van Independent News & Media (INM), Gavin O’Reilly, wou nie spekuleer oor die kans dat die raad ’n ooreenkoms met die groep se finansiers bereik nie, maar beklemtoon dat “al die partye saamwerk tot oplossing van die skuld-kwessie … die alternatief is te aaklig vir almal.”
Die aandeelprys het oor die laaste jaar amper 90% gedaal en het verlede week op 28 euro sent (R3.15) in Dublin gesluit.