'n Enkel-pa van Phoenix wat sy karige woonstelletjie vir 'n appel en 'n ei verkoop het skaars 'n uur nadat hy sy titelakte ontvang het, het sy blyplek teruggekry.
Sanjeev Bissessur was van die baie Phoenix-stadsraadsinwoners wat die titelakte vandeesweek by die eThekweni-munispaliteit gekry het. Hy het die woonstel in Whetstone, wat hy en sy familie die afgelope 30 jaar gehuur en hy ná sy ma se dood verlede jaar oorgeneem het, vir 'n skamele R30 000 aan 'n vriend, Ally Shaik, verkoop. Die woonstel is meer as R100 000 werd.
Bissessur het twee dae later sy besluit verander, en het sy woonstel met die hulp van die ANC-politikus Omie Singh teruggekry. Shaik het dit egter nie teengestaan nie. "Ek het gesê hy en sy seun kan maar daar bly solank hulle wil, maar hy het sy besluit verander," het Shaik gesê.
