Die Kommissie vir Versoening, Mediasie en Arbitrasie (CCMA) het 495 poste gered deur 'n ooreenkoms te bewerkstellig waarin mynwerkers by die Buffelsfontein-goudmyn naby Klerksdorp ingestem het om gereelde ekstra skofte te werk as die maatskappy sy afleggingsplan terugtrek.
Die ooreenkoms tussen die myn, wat aan Simmer & Jack behoort, behels dat die myn pleks van 500 afleggings nou net vyf senior kontrakwerkers sal aflê en 65 kontrakwerkers permanent sal aanstel. Daarbenewens sal ondergrondse werkers een ekstra skof per maand tot die einde van die jaar werk.
Die myn het gesê stygende bedryfs- en materiaalkoste het die stap genoodsaak.
